రాయలేను కవిత నేను

రాయలేను కవిత నేను
దుశ్సాసన గురువులున్న ఈ సమాజంలో బ్రతుకుని భరిస్తూ
ద్రౌపతిగా మారిన నా తెలుగు తల్లిని పూజిస్తూ .......

రాయలేను కవిత నేను
వ్యాపారమైన నేటి రాజకీయాలని భరించలేక
చితిని రగిలే రైతుల ఆత్మఘోషలని వింటూ ..........

రాయలేను కవిత నేను
వికృతమైన మనిషి చేష్టలకు ఆహుతై
ఆకృతోడిన ఈ ప్రకృతిని ఆస్వాదిస్తూ ......

రాయలేను కవిత నేను
నైతిక విలువలను ఏమార్చి న్యాయ, ధర్మ దేవతలను
వికలాంగులుగా మార్చిన ఈ సమాజాన్ని కీర్తిస్తూ .......

రాయలేను కవిత నేను
జననం, జీవనం, మరణాలే
జీవితం అని చెప్పే వేదాలను వర్ణిస్తూ ......

రాయలేను కవిత నేను
అక్షరం విలువ తెలియని
ఆటవికులు నిండిన ప్రపంచంలో జీవిస్తూ ...............

రాయలేను కవిత నేను, తలరాత మార్చలేని దానను.

ఏడడుగులు...........

ఎందరిలో వున్నా
నీ సవ్వడే వినిపిస్తుంది

ఏ పనిలో వున్నా
నీతో మాట్లాడాలి అనిపిస్తుంది

ఓపిక లేకున్నా
నిన్ను కలవాలి అనిపిస్తుంది

ఇంతవరకు నిన్ను చూడకున్నా
ఏడడుగులు నీతో నడవాలి అనిపిస్తుంది

ఎదురు చూస్తూ ........

ఒక పువ్వు వికసిస్తూ చెప్పింది
నీ ముంగురుల సోయగంలో వడలిపోవాలని

ఒక మేఘం వర్షిస్తూ చెప్పింది
నీ మోము తాకి నేల జారాలని

ఒక దీపం వెలుగుతూ కోరింది
నీ అందం చూస్తూ కరిగిపోవాలని

ఒక రుతువు ఎదురు చూస్తుంది
మనం కలసి పయనించే రోజు ఎపుడు వస్తుందా అని

ఒక రాత్రి పరితపిస్తుంది
సమ్మోహన సౌరభాలను తెఛే గాలి మనతో కలసి పరవశించే క్షణం ఎపుడు వస్తుందా అని

నీతో కలసి నడిచే క్షణం కోసం ఎదురుచూస్తూ ...... (మన పెళ్లి పుస్తకం )